ਬੈਂਗਲੁਰੂ ਕੈਫੇ ਧਮਾਕਾ ਮਾਮਲੇ ਚ ਹੁਣ ਐੱਨਆਈਏ ਦੇ ਹੱਥ ਵੱਡੇ ਸਬੂਤ ਲੱਗੇ ਹਨ। ਇਸ ਧਮਾਕੇ ਦੇ ਸ਼ੱਕੀ ਵਿਅਕਤੀ ਦੀਆਂ ਤਾਜ਼ਾ ਤਸਵੀਰਾਂ ਸਾਹਮਣੇ ਆਈਆਂ ਹਨ। ਤਸਵੀਰਾਂ ‘ਚ ਸ਼ੱਕੀ ਵਿਅਕਤੀ ਨੂੰ ਬਿਨਾਂ ਟੋਪੀ ਅਤੇ ਮਾਸਕ ਦੇ ਬੱਸ ‘ਚ ਸਫਰ ਕਰਦੇ ਦਿਖਾਇਆ ਗਿਆ ਹੈ। ਸੂਤਰਾਂ ਮੁਤਾਬਕ ਨੈਸ਼ਨਲ ਇਨਵੈਸਟੀਗੇਸ਼ਨ ਏਜੰਸੀ ਨੇ ਨੇੜਲੇ ਮਸਜਿਦ ਦੇ ਬਾਹਰ ਸ਼ੱਕੀ ਦੀ ਬੇਸਬਾਲ ਕੈਪ ਵੀ ਬਰਾਮਦ ਕੀਤੀ ਹੈ। ਇਕ ਸੂਤਰ ਨੇ ਕਿਹਾ ਕਿ ਬੇਂਗਲੁਰੂ ਸ਼ੱਕੀ ਨੇ ਧਮਾਕੇ ਤੋਂ ਬਾਅਦ ਆਪਣੇ ਕੱਪੜੇ ਬਦਲ ਲਏ ਹਨ।
ਸ਼ੱਕੀ ਦੀ ਪਛਾਣ ਦੇ ਕੁਝ ਪਹਿਲੂਆਂ ਦਾ ਖੁਲਾਸਾ 1 ਮਾਰਚ ਦੇ ਸੀਸੀਟੀਵੀ ਟ੍ਰੇਲ ਰਾਹੀਂ ਹੋਇਆ ਸੀ, ਜਦੋਂ ਬੈਂਗਲੁਰੂ ਦੇ ਵ੍ਹਾਈਟਫੀਲਡ ਖੇਤਰ ਵਿੱਚ ਰਾਮੇਸ਼ਵਰਮ ਕੈਫੇ ਵਿੱਚ ਹੋਏ ਬੰਬ ਧਮਾਕੇ ਵਿੱਚ 9 ਲੋਕ ਜ਼ਖਮੀ ਹੋ ਗਏ ਸਨ। ਸੀਸੀਟੀਵੀ ਕੈਮਰਿਆਂ ਵਿੱਚ ਸ਼ੱਕੀ ਵਿਅਕਤੀ ਨੂੰ ਸਵੇਰੇ 10.45 ਵਜੇ ਦੇ ਕਰੀਬ ਕੈਫੇ ਤੋਂ 100 ਮੀਟਰ ਦੀ ਦੂਰੀ ‘ਤੇ ਸਥਿਤ ਬੱਸ ਸਟਾਪ ‘ਤੇ ਇੱਕ ਜਨਤਕ ਬੱਸ ਵਿੱਚ ਆਉਂਦਾ ਦਿਖਾਈ ਦਿੱਤਾ। ਸਵੇਰੇ 11.34 ਵਜੇ ਕੈਫੇ ਵਿੱਚ ਦਾਖਲ ਹੁੰਦਾ ਹੈ। 11.43 ‘ਤੇ ਬਾਹਰ ਨਿਕਲਦਾ ਹੈ ਅਤੇ ਫਿਰ ਜਨਤਕ ਬੱਸਾਂ ਦੀ ਵਰਤੋਂ ਕਰਕੇ ਬਚਣ ਲਈ ਇੱਕ ਕਿਲੋਮੀਟਰ ਤੋਂ ਵੱਧ ਦੂਰ ਬੱਸ ਸਟਾਪ ‘ਤੇ ਜਾਂਦਾ ਹੈ। ਉਸ ਦੀਆਂ ਸਾਰੀਆਂ ਗਤੀਵਿਧੀਆਂ ਕੈਮਰੇ ਵਿਚ ਕੈਦ ਹੋ ਗਈਆਂ ਹਨ। ਬੁੱਧਵਾਰ ਨੂੰ, NIA ਨੇ ਸ਼ੱਕੀ ਬਾਰੇ ਜਾਣਕਾਰੀ ਦੇਣ ਵਾਲੇ ਨੂੰ 10 ਲੱਖ ਰੁਪਏ ਦੇ ਇਨਾਮ ਦਾ ਐਲਾਨ ਕੀਤਾ ਅਤੇ ਇਸਦੀ ਸੀਸੀਟੀਵੀ ਫੁਟੇਜ ਵੀ ਪੋਸਟ ਕੀਤੀ।
